Kurti: Do të investojmë në siguri duke llogaritur në ShBA-në

Kryeministri Albin Kurti në Akademinë Përkujtimore për Epopenë e UÇK-së, që u mbajt në Prishtinë, theksoi nevojën për investim në siguri, sidomos pas luftës që po zhvillohet në Ukrainë.

Kurti ka theksuar se për siguri do të investohet edhe më tutje, duke llogaritur edhe në ShBA-të, teksa ka thënë se Kosova gjatë katër viteve që shkuan i është përmbajtur planit të NATO-s, për investim në ushtri.

“Horizonti i së ardhmes po errësohet nga retë e zeza nga lufta që po ndodh në Ukrainë. Në katër vitet e kaluara në e kemi përmbushur kuotën e Nato-s për investim në ushtri. Përpjekja jonë për sigurinë dhe paqe do të vazhdojë me investim në siguri, duke llogaritur në aleancën me ShBA-në, BE-në, Turqinë e Kanadanë. Kosova mbetet e përkushtuar jo vetëm për të përfituar por edhe për të ndihmuar për paqen në Evropë. Kosova nuk është ajo që veç konsumon nga siguria në Europë, por që edhe kontribuon për këtë siguri. Kosova mëton të anëtarësohet edhe në BE edhe në NATO.“