Dy punëtorë rrahen mes vete në Fushë Kosovë

Rastet e përleshjeve në vendin e punës janë incidente jo fort të rralla në vendin tonë dhe motivi kryesisht lidhet për çështje punë. Kështu dyshohet se ndodhi së fundmi në një objekt në rrugën “Pajazit Islami” në Fushë Kosovë, raporton Gazeta Sinjali.

Dy punëtorët ndërtimtarie u rrahën me njëri – tjetrin pas një mosmarrëveshje që plasi mes tyre derisa ishin duke punuar.

Sinjali mëson se përleshja ndodhi te blloku i Model Slovenia në atë rrugë dhe nisi si konflikt verbal me sharje e ofendime e më pas eskaloi.

Të dyshuarit, njëri 27-vjeçar e tjetri 35-vjeçar përfunduan në pranga të Policisë, ku njëri prej tyre deklaroi se edhe është kërcënuar nga kolegu i tij.

Burimet brenda Prokurorisë kanë bërë me dije se bazuar në dëshminë e tij, ai ka pretenduar se i dyshuari 35-vjeçar ka kanosur seriozisht duke i thënë se “Kom me marr kallashin dhe me t’vra”.

Pas përfundimit të procedurave policore, të dy punëtorët e dyshuar janë dërguar në mbajtje për 48 orë.