Policia gjen thika dhe boksa të hekurit tek nxënësit

Siguria në shkollë çdo ditë e më shumë po rrezikohet, për shkak të mos kujdesit ndaj nxënësve, ata po mbajnë mjetet të ftohta me vete. Kjo po shkakton frikë dhe panik edhe tek prindërit, pasi që në vendin ku fëmijët e tyre po shkollohen, me lehtësi mund të pajisjen me armë të ftohta, boks metali e maska, raporton Gazeta Sinjali.

Një rast i tillë ka ndodhur në Komunën e Vushtrrisë, ku Policia e Kosovës, gjatë ditës së sotme ka realizuar një kontroll sigurie në shkollat e mesme të ulëta dhe të larta në Vushtrri, me qëllim parandalimit të veprave penale dhe rritjes së sigurisë në ambientet shkollore.

Aksioni është kryer në bazë të urdhëresës së Gjykatës kompetente, ku janë kontrolluar mbi 1379 nxënës.

Gjatë kontrollit, tek disa nxënës janë gjetur dhe sekuestruar një thikë, një maskë dhe një boks metali.

“Policia mbetet e përkushtuar për bashkëpunim të ndërsjellë me autoritetet e arsimit në parandalim dhe ofrimin e sigurisë në shkolla”, thuhet në njoftimin e policisë në Facebook.