Vetura përfundoi jashtë rrugës
Një aksident i rëndë trafiku ka ndodhur mëngjesin e sotëm në fshatin Galicë të Vushtrisë, ku për pasojë një person ka humbur jetën dhe disa të tjerë kanë mbetur të lënduar. Automjeti i aksidentuar po transportonte disa nxënës për në shkollë, ndërsa viktima e këtij rasti është shoferi 59-vjeçar, Hajzer Sadiku, raporton Gazeta Sinjali.
Sipas informacioneve zyrtare, shoferi e ka humbur jetën disa orë pas aksidentit, ndërsa të lënduar kanë mbetur shtatë pasagjerë, të cilët kanë pranuar ndihmë mjekësore.
Rasti tashmë është konfirmuar nga Policia e Kosovës, të cilët kanë njoftuar se vetura e aksidentuar ka përfunduar jashtë rrugës.
“Një aksident trafiku me pasojë fataliteti është raportuar sot rreth orës 08:00, i shkaktuar në rrugën lokale në fshatin Galicë të Vushtrrisë. Në aksident është përfshirë një veturë, ku si pasojë e lëndimeve të pësuara rreth orës 11:00 nga SHSKUK-ja është raportuar se ka humbur jetën shoferi i veturës viktima H. S., 59 vjeçar, ndërsa lëndime kanë pësuar edhe shtatë (7) pasagjeret që ndodheshin në automjet.
Nga hetimet e para të zhvilluara në vendngjarje, bëhet e ditur se si shkaktar i aksidentit dyshohet të ketë qenë pakujdesia dhe mospërshtatja e shpejtësisë me kushtet e rrugës ku për pasojë vetura përfundon jashtë rruge”, ka thënë mes tjerash zëdhënësi i Policisë për rajonin e Mitrovicës, Avni Zahiti.
Me urdhër të prokurorit trupi i pa jetë i viktimës është dërguar në IML për obduksion.
Ndërkaq, për këtë rast tragjik ka njoftuar edhe kryetari i Vushtrrisë, Ferit Idrizi.
“Në një aksident që ka ndodhur gjatë transportit të nxënësve nga fshati Duboc, komuna jonë ka humbur një burrë të ndershëm e një qytetar të përgjegjshëm, shoferin e kësaj linje, Hajzer Sadiku, ndërsa janë lënduar edhe disa nxënës, të cilët tashmë janë duke marrë trajtim në Emergjencën e Spitalit “Sheikh Zayed” në Vushtrri.
Në emër të Komunës tonë, i shpreh ngushëllimet më të thella familjes Sadiku, ndërsa nxënësve të lënduar ju uroj shërim sa më të shpejtë”, ka shkruar ai në Facebook.
