Durmishi: Vendimi i Përparim Ramës për transportin, është në kundërshtim me ligjin

Postimi i Hysen Durmishit:

Vendimi i Përparim Ramës për transportin, është në kundërshtim me ligjin

Komuna e Prishtinës nuk ka ende plan të transportit të aprovuar e cili më pastaj do të duhej të dërgohej në ministri që të konstatohej ligjshmëria e tij. Nuk kanë as rregullore të transportit të miratuar. Ky është obligim ligjor dhe çfardo plani i transportit nuk duhet që të afektoj linjat ndërurbane.

Transportuesit e udhëtarëve me autobus për linjat ndërurbane të relacionit Prishtinë – Podujevë dhe anasjelltas veprojnë sipas rendit të udhëtimit të miratuar nga ministria dhe këtë nuk mund ta ndryshoj as Komuna e Prishtinës e as ndonjë Komunë tjetër në Kosovë. Një gjë të tillë mund ta bëjmë vetëm ne si ministri.

Përsonalisht i kam pritur në takim zyrtarë të lartë të komunës dhe këshilltarë të kryetarit. Atyre ju kemi shpjeguar për hapat që duhet të ndërmarrë komuna dhe për mundësinë e një marrëveshje në mes komunës së Prishtinës dhe asaj të Podujevës për rregullimin reciprok të transportit urban dhe urbanoperiferik. Dhe çuditërisht në vend që të vazhdohej kjo rrugë e zgjidhjes ne e morëm një email nga zyrtarë të Komunës së Prishtinës për një vendim të kundërligjshëm të kryetarit Përparim Rama.

Sot gjatë ditës ne kemi kërkuar që urgjentisht të shfuqizohet ky vendim. Po presim që Komuna e Prishtinës të reflektoj dhe të shfuqizohet ky vendim deri të hënën. Nëse kjo nuk ndodh atëherë do të veprojmë ne në bazë të përgjegjësive e kompetencave ligjore që i kemi.