VV nuk pajtohet me rezultatin e zgjedhjeve, ankohet në PZAP

Zëvendësministri i Drejtësisë, Blerim Sallahu, ka deklaruar se Lëvizja Vetëvendosje ka kërkuar nga Paneli Zgjedhor për Ankesa dhe Parashtresa (PZAP), anulimin e 18,933 votave të Lidhjes Demokratike të Kosovës (LDK), të cilat ai i cilësoi si të manipuluara.

Në një konferencë për media para PZAP-së, Sallahu tha se përveç anulimit të këtyre votave, LVV-ja ka kërkuar edhe rivotim të votave të ardhura me postë dhe largimin nga lista të kandidatëve që kanë marrë më shumë vota nga diaspora sesa në vendvotimet brenda Kosovës.

“Ne kemi kërkuar nga PZAP që të anulohen 18 mijë e 933 vota të LDK-së të kontaminuara të ardhura në formë të manipuluara po ashtu kemi kërkuar rivotim të serishëm të votimit më postë, dhe kemi kërkuar që kandidatët që kanë marrë votë pakrahasimisht më shumë me postë sesa vendvotime në Kosovë të largohen nga lista dhe të njëjtit të mos zëvendësohen më anëtarë të tjerë të LDK-së”, ka theksuar ai

Sipas Sallahut, ky rast tregon qartë “vjedhjen e vullnetit të qytetarëve”, duke theksuar se përgjegjës për këtë, sipas tij, është LDK.

“PZAP e ka një mundësi të tillë ligjore dhe një bazë të dëshmive dhe fakteve që tashmë i kemi dërguar në PZAP dëshmohet qartë se manipulimi i tillë ka ndodhur këto tri kërkesa tona duhet të vendosen në vendimin e PZAP-së për shkak të provave dhe dëshmive që i kemi bërë. Pra, mund të them se vjedhja e vullnetit të qytetarëve tash ka emër ajo është LDK”, ka deklaruar Sallahu