Dhuna në familje nuk ndalet

Gratë po vazhdojnë të jenë viktimat më të shpeshta të dhunës që përjetojnë kryesisht nga bashkëshortet e tyre. Kjo dukuri shqetësuese ka marrë përmasa të mëdha kohëve të fundit dhe kjo dëshmohet çdo ditë me numrin e rasteve të tilla që denoncohen në Polici, raporton Gazeta Sinjali.

Një tjetër rast i rëndë është raportuar së fundmi në Prishtinë, ku një grua ka denoncuar partnerin e saj për dhunë fizike dhe psikike, e cila sipas saj ka qenë e vazhdueshme.

Sipas burimeve të Gazetës Sinjali, viktima është një 32-vjeçare, e cila ka raportuar në Polici se burri i saj e ka sulmuar fizikisht duke e goditur me grushte në pjesë të ndryshme të trupit dhe për pasojë i ka shkaktuar lëndime.

Në dëshminë e saj, ajo ka thënë se ky nuk është rasti i parë që ka përjetuar dhunë, prandaj ka vendosur ta njoftojë Policinë dhe ka kërkuar urdhër mbrojtës.

Si rezultat i denoncimit, i dyshuari u arrestua dhe gjatë intervistimit ka mohuar akuzat ndaj tij.

Me urdhër të Prokurorit të Shtetit, rasti ndaj tij është iniciuar si “Dhunë në familje” dhe është dërguar në mbajtje.