Shërbimi Korrektues i Kosovës dhe EULEX fuqizojnë kapacitetet e stafit për rehabilitimin e të burgosurve

Shërbimi Korrektues i Kosovës (SHKK), me mbështetjen e EULEX-it, po vazhdon të investojë në ngritjen e kapaciteteve të stafit për të siguruar rehabilitim më efektiv dhe trajtim të duhur për të burgosurit.

Në kuadër të këtyre përpjekjeve, u organizua një trajnim dy-modulor për 28 pjesëtarë të stafit korrektues, i fokusuar në çështje kyçe që lidhen me rehabilitimin dhe riintegrimin e të burgosurve:

• Moduli i parë: U përqendrua në sfidat e varësisë nga substancat brenda burgjeve dhe qasjet për trajtimin e tyre, duke synuar përmirësimin e procesit të rehabilitimit dhe riintegrimit pas lirimit.

• Moduli i dytë: Trajtoi mënyrat e veçanta të qasjes ndaj grave të burgosura, të miturve (femra dhe meshkuj), si dhe të burgosurve të cenueshëm, përfshirë ata me probleme të shëndetit mendor ose në rrezik vetëlëndimi.

Ky trajnim shënon një hap tjetër të rëndësishëm në përpjekjet për ndërtimin e një sistemi korrektues më profesional dhe gjithëpërfshirës, duke vënë në pah bashkëpunimin e ngushtë mes SHKK-së dhe EULEX-it për të garantuar një qasje më humane dhe rehabilituese ndaj të burgosurve.