Detaje të reja

Një aksident i rëndë trafiku ka ndodhur sot në Gerlicë të Ferizajt, ku një veturë është përplasur rëndë me një kamionetë.

Për shkak se përplasja ka ndodhur në anën e shoferit të kamionetës, ky i fundit është detyruar të marrë tretmanin e parë mjekësor pa lëvizur nga vendi.

Zjarrfikësit raportohet të kenë intervenuar për të nxjerrë me kujdes shoferin nga automjeti.

Rastin e ka konfirmuar edhe zëdhënësi i policisë për rajonin e Ferizajt, Kanun Veseli.

Veseli deklaroi për IndeksOnline se aksidenti ndodhi ne segmentin Varosh-Gerlicë, rreth orës 17:00.

“Në aksident janë përfshirë dy automjete me targa vendore. Përveç dëmeve materiale, katër persona kanë pësuar lëndime trupore dhe janë dërguar për ndihmë mjekësore në Qendrën Emergjente në Ferizaj.

Njëri prej të lënduarve, për shkak të gjendjes shëndetësore, është transportuar për trajtim të mëtejshëm në Qendrën Klinike Universitare të Kosovës (QKUK), në Prishtinë”, tha Veseli.

Njësitet relevante kanë nisur hetimet mbi rrethanat e aksidentit.