Kurti pyetet për refuzimin e Abdixhikut – nuk jep përgjigje, largohet nga gazetarët

Kryeministri në detyrë, Albin Kurti, refuzoi të përgjigjet në pyetjet e gazetarëve për refuzimin që Lidhja Demokratike e Kosovës, ia bëri ftesës për takim konsultativ.

Kurti pa e thënë asnjë fjalë u largua nga gazetarët, sot kur ishte për homazhe në Koshare.

Kreu i LDK-së, Lumir Abdixhiku, dje përmes një komunikate njoftoi se nuk do të shkojë në takimin e ftuar nga Kurti lidhur me formimin e institucioneve.

“Duket se fjalët e thëna e bindjet e ushqyera në vijimësi, nuk kanë peshë njëjtë për të gjithë. Sepse, pavarësisht të gjithë gjërave të thëna, të bëra e stërbëra, dje kam pranuar një letër nga Kryetari i Lëvizjes Vetëvendosje, z. Kurti, për takim konsultativ mes nesh. Sado që unë dhe LDK nuk udhëhiqemi nga inati; sado që ne besojmë në dialog, bashkëpunim e komunikim njerëzor e politik; një takim i tillë – madje edhe konsultativ – do të ishte kapërcim fatal i dinjitetit njerëzor dhe politik”.

“Mes ‘hajvanatit’, ‘mbytjes së LDK-së’, ‘bashkëpunëtorëve të Serbisë’, mes moçalit të madh të pështymave ndaj nesh – unë, LDK dhe votuesit tanë – nuk e gjejmë veten as për konsultim. Sepse fjalët, si edhe bindjet, kanë peshë”, tha dje Abdixhiku.