Hajnat i hyjnë në dhomë të fjetjes burrit nga Prishtina, ia marrin armën me leje dhe municion
Siguria publike në Kosovë konsiderohet se po cenohet nga krime të natyrave të ndryshme, e sidomos nga vjedhjet e grabitjet, fenomen ky mjaft shqetësues, që po shkakton humbje e pasiguri për bizneset dhe qytetarët, raporton Gazeta Sinjali.
Një rast, por më i pazakontë ka ndodhur në Prishtinë, ku disa persona kanë hyrë me forcë në një banesë dhe e kanë vjedhur një armë zjarri me leje.
Rastin, siç merr vesh Gazeta Sinjali, e ka raportuar pronari, i cili ka treguar se armën e kishte në dhomën e tij të gjumit.
Të dyshuarit, që ende nuk janë identifikuar nga Policia, kanë depërtuar në dhomën e tij të gjumit dhe kanë marrë armën e tij të regjistruar dhe një sasi municioni.
Policia me ta marrë vesh rastin ka dalë në vendin e ngjarjes dhe ka kryer ekzaminimet fillestare.
Me urdhër të Prokurorit rasti është iniciuar si “Vjedhje e rëndë” dhe hetimet janë duke vazhduar për të identifikuar dhe arrestuar autorët.
