Dy motra në gjendje të rëndë

Gazeta Sinjali mëson ekskluzivisht se sot rreth orës 11:38, në fshatin Grashticë të Komunës së Prishtinës, ka ndodhur një aksident i rëndë komunikacioni, ku dy persona kanë pësuar lëndime serioze trupore.

Sipas burimeve të Sinjalit brenda organeve të rendit, aksidenti ka ndodhur mes dy automjeteve: Fiat me ngjyrë të hirtë, që drejtohej nga Samire Avdullahu, rreth 29-vjeçare, me pasagjere Anitën Avdullahu, rreth 27-vjeçare– të dyja motra dhe me banim në Prishtinë, dhe Volkswagen, që drejtohej nga Brahim Krasniqi, rreth 57-vjeçar , banues po ashtu në Prishtinë.

Të dy motrat kanë pësuar lëndime të rënda dhe janë dërguar menjëherë në QKUK – Emergjencë, ku ndodhen në gjendje të rëndë, por stabile, sipas mjekëve kujdestarë.

Në vendin e ngjarjes kanë dalë njësitë policore dhe ekipi hetimor i Njësisë Rajonale për Komunikacion Rrugor, të cilët kanë ndërmarrë veprimet e para për zbardhjen e rrethanave të aksidentit.

Me urdhër të Prokurorit kujdestar të Shtetit, rasti është iniciuar në procedurë të rregullt, ndërsa hetimet po vazhdojnë për të përcaktuar përgjegjësinë e plotë të palëve të përfshira.

Gazeta Sinjali do të sjellë informacionet më të fundit lidhur me gjendjen shëndetësore të të lënduarave dhe zhvillimet hetimore.