Përleshja fizike mes të rinjëve brenda QKUK-së

Gazeta Sinjali sot ka raportuar ekskluzivisht për një përleshje e cila ka shpërthyer mes tre personave dhe ka degjeneruar në përdorimin e thikave.Të lënduarit kanë marrë trajtim urgjent në QKUK, dhe sipas ekipit mjekësor ata janë jashtë rrezikut për jetë, pavarësisht natyrës së lëndimeve të rënda trupore që kanë pësuar, ku pas një therjeje me thikë, përleshja ka vazhduar edhe brenda objektit të Qendrës Klinike Universitare të Kosovës (QKUK).

Sinjali raportoi ekskluzivisht se gjithçka ka nisur në rrugën “Lidhja e Prizrenit”, ku ka shpërthyer një përleshje fizike mes tre të miturve: Andi Xhela, rreth 18-vjeçar, Jasir Beqiri, rreth 19-vjeçar dhe Olti Ahmeti, rreth 18-vjeçar.

Pas përleshjes, Andi Xhela ka përfunduar në QKUK për trajtim mjekësor, ku ndodhi një tjetër incident i rëndë.

Në objektin e spitalit është paraqitur Kreshnik Krasniqi, rreth 19-vjeçar shok i Andit, i cili dyshohet se e ka goditur me “boks” të hekurit në fytyrë, Jasir Beqirin.

Përleshja ndodhi në praninë e stafit mjekësor dhe të policëve që ishin në detyrë sekondare në QKUK, të cilët kanë ndërhyrë menjëherë për të neutralizuar situatën.

E lidhur me intervenimin e tyre, Gazeta Sinjali ka kontaktuar mjekun kujdestar, Avdush Bajgora, i cili ka qenë në ato momente aty dhe ka përshkruar ngjarjen si të tmerrshme, duke theksuar se ka qenë vetëm falë ndërhyrjes së shpejtë të sigurimit të QKUK-së dhe policisë që situata kaloi.

Ai shtoi se njëri nga të lënduarit ka pësuar dëmtime në pjesën e pasme të shpinës me një mjet të mprehtë, ndërsa tjetri ka marrë goditje në kokë me një mjet të fortë.

Për të lënduarit, njëri është shtrirë në Kirurgjinë Torakale për trajtim më të specializuar, ndërsa tjetri është liruar pas trajtimit të nevojshëm.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.