Rrah bashkëshorten pas 21 vitesh martesë

Një tjetër rast i rëndë i dhunës në familje është regjistruar në orët e para të mëngjesit të së hënës në rrugën “Vushtrria” në Prishtinë, ku një grua ka kërkuar ndihmën e Policisë pas një sulmi fizik nga bashkëshorti i saj.

Burime të Gazetës Sinjali mësojnë se N. M. ka raportuar se është viktimë e dhunës nga burri i saj Visar Ballovci, me të cilin është në martesë tash e 21 vjet dhe kanë dy fëmijë.

Sipas viktimës, mosmarrëveshjet mes tyre kanë qenë të vazhdueshme ndër vite, për çka ajo thotë se ka pasur edhe raste të mëhershme të raportuara në Polici.

Por më 5 maj 2025, pas një konflikti të fundit, Ballovci dyshohet se e ka sulmuar fizikisht duke e goditur me grushte në pjesë të ndryshme të trupit, duke i shkaktuar lëndime.

Musolli ka pranuar trajtimin mjekësor dhe posedon raportet për lëndimet e pësuara, ndërsa ka deklaruar se ndjehet e rrezikuar nga bashkëshorti i saj.

Nga ana tjetër, i dyshuari nuk e ka pranuar veprën, duke mohuar se ka ushtruar dhunë.

Lidhur me rastin është njoftuar prokurori kujdestar për dhunë në familje, i cili ka urdhëruar ndalimin e të dyshuarit për 48 orë dhe inicimin e rastit si “Dhunë në familje”.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.