LDK pas letrës, Abdixhiku propozon qeveri të tranzicionit

Kryetari i LDK-së, Lumir Abdixhiku është deklaruar për herë të parë pas letrës së dërguar nga lideri i VV-së, Albin Kurti drejt kësaj partie.

Në një konferencë për media, ai ka propozuar qeveri nacionale të tranzicionit.

“Kam marr një letër nga Albin Kurti dhe i nxitur nga konsiderata për votuesit e VV-së, kam ndjerë nevojën që pas konsultimeve t’i përsëris qëndrimet tona. LDK për mungesë besimi dhe duke pasur parasysh stagnimin katërvjeçar të shkuara, rrezikim serioz të demokracisë dhe lirisë të shprehjes, mosrespektimin e vendimeve të institucioneve, e ka vlerësuar të pamundur bashkëpunimin me VV-në pra me Albin Kurtin”, tha ai, njofton Klankosova.tv.

“LDK dhe unë si kryetar i saj propozojmë nisjen e një procesi të ri politik dhe kjo zgjidhje kërkon përgjegjshmëri, edhe unitet dhe vetëdije të lartë politike nacionale në vend. Në përputhshmëri me këtë, LDK propozon nisjen e një procesi konsultativ me të gjitha partitë me qëllim formimin e qeverisë nacionale të tranzicionit”, u shpreh Abdixhiku.