Qytetari gjen drogë në veturë gjatë riparimit, njofton Policinë

Policia e Kosovës ka sekuestruar rreth 3.6 kilogramë marihuanë në një veturë që ishte dërguar për riparim në Kamenicë. Hetuesit e antidrogës në Gjilan kanë ndërhyrë pas një njoftimi nga një qytetar, i cili kishte zbuluar dy paketime të dyshuara me substancë narkotike gjatë riparimit të ulëses së automjetit të tij, shkruan Gazeta Sinjali.

Ngjarja ka ndodhur dje rreth orës 21:00. Pas pranimit të informacionit, njësitë relevante kanë dalë në vendin e ngjarjes dhe kanë gjetur rreth 1.8 kg marihuanë. Vetura është sekuestruar dhe është transferuar për kontroll të mëtejshëm në stacionin policor në Gjilan.

Më 11 maj, gjatë një kontrolli të detajuar, në ulësen e përparme të pasagjerit janë zbuluar edhe 1.873 kg marihuanë shtesë. Sasia totale e sekuestruar arrin në rreth 3.6 kg.

Lidhur me rastin është njoftuar Prokurori i Shtetit, ndërsa hetimet janë duke vazhduar për identifikimin dhe ndjekjen e personave të përfshirë në këtë rast.