Djali përzë prindërit nga shtëpia

Një ngjarje e rëndë është raportuar të ketë ndodhur mbrëmë në Malishevë, ku një çift i moshuar është përzënë nga shtëpia nga djali i tyre, i cili sipas viktimave vuan nga probleme të shëndetit mendor.

Burimet e Sinjalit bëjnë të ditur se më 19 maj 2025, rreth orës 22:00, në Stacionin Policor në Malishevë janë paraqitur dy viktimat me inicialet S.M. dhe Sh.M., të cilët kanë deklaruar se janë përzënë nga djali i tyre, K.M., pas një konflikti verbal që ka degjeneruar në situatë të rrezikshme.

Sipas dëshmisë së prindërve, djali i tyre, që sipas tyre është agresiv dhe me çrregullime mendore, i ka detyruar të largohen nga banesa me të bërtitura dhe kërcënime, duke u thënë se nuk dëshiron t’i shohë më aty.

Njëri nga prindërit, Sh.M., ka raportuar edhe lëndime trupore në fytyrë dhe qafë, por ka sqaruar se është lënduar në përpjekje për të dalë nga dera, për shkak të tensionit të situatës.

I dyshuari aktualisht ndodhet në arrati, ndërkohë që autoritetet kanë ndërmarrë veprimet për lokalizimin dhe shoqërimin e tij, në koordinim me Prokuroren Kujdestare, e cila ka urdhëruar që rasti të iniciohet si “Dhunë në familje”.

Pas intervistimit dhe kontrollit mjekësor, me pëlqimin deklarativ të viktimave, ata janë strehuar përkohësisht në shtëpinë e dhëndrit të tyre në fshatin Bllacë.

Hetimet për rastin po vazhdojnë.