Të shtëna me armë në një dasmë – 17-vjeçari përdor armën e familjarit, ndërhyn Policia

Një rast i përdorimit të armës së zjarrit është regjistruar më 25 maj 2025 në fshatin Terstenik të Drenasit, ku Policia ka ndërhyrë pas raportimeve për të shtëna në një aheng familjar.

Sipas burimeve të Sinjalit, gjatë një pike kontrolli rutinore, zyrtarët policorë kanë dëgjuar të shtëna me armë zjarri dhe menjëherë kanë ndërhyrë në drejtim të zhurmës, duke u drejtuar në një aheng në fshatin Terstenik.

Në vendin e ngjarjes, Policia ka intervistuar një të afërm të të dyshuarit, F.B, i cili ka pranuar se të shtënat janë kryer nga Dionis Bylykbashi, një 17-vjeçar nga i njëjti fshat. Sipas deklarimeve, arma ka qenë në pronësi të një familjari tjetër, Eron Bylykbashi dhe ka qenë me leje zyrtare, por e është përdorur në mënyrë të papërshtatshme gjatë festës.

Policia ka konfiskuar një revole dhe 45 fishekë, si dhe ka gjetur tri gëzhoja në vendin e ngjarjes. Të dy – pronari i armës dhe i mituri që dyshohet për përdorim – janë intervistuar nga hetuesit, ndërsa Prokurori i Shtetit ka urdhëruar që rasti të iniciohet si vepër penale: “Përdorim i armës apo mjetit të rrezikshëm”.

Të dyshuarit janë liruar në procedurë të rregullt, ndërkohë që hetimet po vazhdojnë.

Ky është një nga rastet e shumta që dëshmon se festat me armë mund të përfundojnë me pasoja penale, pavarësisht qëllimit festues të pjesëmarrësve.

Shënim: Personat e apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata