Zhduket 17-vjeçarja nga Prishtina – dyshohet se ndodhet në Vushtrri

Nuk janë të rralla rastet kur qytetarët kërkojnë ndihmën e Policisë për t’i gjetur familjarët e tyre që raportohen të zhdukur. Shumë shpesh angazhohen edhe njësi e grupe vullnetare që të zbulojnë gjurmët e personave që nuk dihet asgjë për fatin e tyre, raporton Gazeta Sinjali.

Një rast i tillë është raportuar në Policinë e Kosovës nga një nënë, e cila ka denoncuar zhdukjen e vajzës së saj 17-vjeçare, e cila është larguar nga banesa më 23 maj 2025, rreth orës 19:30, dhe prej atëherë nuk dihet asgjë për vendndodhjen e saj.

Burime të Sinjalit brenda Policisë bëjnë me dije se bëhet fjalë për të miturën Medina Hasani, rreth 18-vjeçare, me vendbanim në rrugën “Holger Pedersen” në Prishtinë.

Në momentin e largimit, nuk dihet se çfarë veshjeje kishte veshur, ndërsa sipas përshkrimit të dhënë nga familja, Medina është: E gjatë rreth 1.65 metra, me flokë kafe, sy kafe dhe peshë mesatare.

Sipas dyshimeve të ngritura nga familjarët, ajo mund të ndodhet në qytetin e Vushtrris, por vendndodhja e saj mbetet e paqartë.

Familja bën apel publik për ndihmë dhe kërkon nga çdo qytetar që ka ndonjë informacion, qoftë edhe minimal, të njoftojë menjëherë Policinë ose të lajmërojë përmes kanaleve të komunikimit të hapura.

“Çdo informatë mund të ndihmojë. Ju lutemi, ndihmoni që vajza jonë të kthehet e sigurt në shtëpi,” – është thirrja e nënës së saj.