E mori me forcë dhe u nis drejt Prishtinës – 22-vjeçari dyshohet se privoi nga liria 19-vjeçaren

Një ngjarje alarmante është denoncuar të shtunën në Gjilan, ku një vajzë e re dyshohet se është marrë pa dëshirë në veturë nga një 22-vjeçar dhe është larguar në drejtim të Prishtinës.

Sinjali mëson se më datë 7 qershor 2025, rreth orës 13:30, në rrugën “Haqif Tetova” në afërsi të ambulantës “Dardania 1”, i dyshuari A.Q. dyshohet se e ka marrë me forcë në veturën e tij “Golf V” me ngjyrë të zezë vajzën 19-vjeçare E. Sh, e cila është kushërirë e ankuesit që denoncoi rastin në Polici.

Sipas kallëzimit, vajza fillimisht ka arritur të kontaktojë përmes telefonit shoqen e saj, duke dhënë shenja shqetësimi, por menjëherë më pas telefoni i saj është fikur dhe nuk ka qenë më e arritshme.

Policia ka reaguar menjëherë dhe ka angazhuar njësinë e hetimeve rajonale për ndriçimin e rastit. Ndërkohë, prokurorja kujdestare ka urdhëruar që rasti të trajtohet si “Privim i kundërligjshëm i lirisë”, ndërsa hetimet janë duke vazhduar me intensitet të shtuar.Ende nuk dihet saktësisht se ku ndodhet vajza dhe cili është qëndrimi i të dyshuarit për ngjarjen.