Bashkëshortja e kishte kapur për këmishë dhe kishte tentuar ta godasë

Një rast i pazakontë i dhunës në familje është raportuar të shtunën pasdite në Prishtinë, ku një burrë ka denoncuar bashkëshorten e tij për sulm fizik dhe sjellje të dhunshme.

Sipas burimeve të Gazetës Sinjali, rreth orës 17:00 të datës 7 qershor, në rrugën “Shaqir Igrishta”, M.S, 47 vjeçar ka njoftuar Policinë se bashkëshortja e tij, M. D. S., 43 vjeçare, e kishte përballuar me sjellje agresive. Ai ka deklaruar se gruaja e kishte mbyllur derën e hyrjes së banesës, e kishte kapur për këmishë dhe kishte tentuar ta godasë, duke bërtitur në mënyrë të vazhdueshme.

Sipas tij, kjo nuk është hera e parë që ajo shfaq sjellje të tilla, por beson se arsyeja është gjendja e rënduar shëndetësore, për të cilën ai ka kërkuar ndihmë mjekësore dhe mbrojtje përmes masave ligjore.

E dyshuara është intervistuar në prani të avokatit mbrojtës dhe më pas, me urdhër të Prokurores kujdestare, është iniciuar rasti “Dhuna në familje”, ndërsa ajo është liruar në procedurë të rregullt.

Burri i saj ka theksuar se nuk ndihet i rrezikuar dhe synimi i tij është vetëm që bashkëshortja të marrë trajtimin e nevojshëm mjekësor.