Vendoset gurthemeli i një projekti të rëndësishëm në Podujevë

Kryetari i Podujevës, Shpejtim Bulliqi, ka njoftuar që sot është vendosur gurthemeli për ndërtimin e Pishinës gjysmëolimpike në Podujevë.

Më poshtë postimi i Bulliqit:

Sot në 26 vjetorin e çlirimit të Komunës së Podujevës bashkë me Kryeministrin Albin Kurti, Ministrin e Kulturës, Rinisë dhe Sportit Hajrulla Çeku, drejtorë e asamblistë komunalë dhe qytetarë, vendosëm gurthemelin e Pishinës gjysmëolimpike në Podujevë, projekt që do të krijojë kushte shumë të mira për sport dhe rekreacion.

Ky investim madhor, me vlerë prej 3,956,120.91 euro, financohet nga Ministria e Kulturës me 3.5 milionë euro dhe nga Komuna e Podujevës me afro 500 mijë euro.

Pishina do të ndërtohet në një hapësirë prej 4,555.88 m² dhe do të përfshijë: Pishinën gjysmëolimpike për not, pishinën për fëmijë si dhe hapësira përcjellëse për gastronomi dhe rekreacion.