Dhunë në mes të ditës në Sheshin “Nënë Tereza” – Sulmon të dashurën, ia merr telefonin dhe e kap për qafe

Një rast i dhunës në familje ka ndodhur në një nga hapësirat më të frekuentuara të kryeqytetit. Një burrë ka ushtruar dhunë fizike ndaj të dashurës së tij në mes të ditës, në Sheshin “Nënë Tereza” në Prishtinë.

Burimet e Gazetës Sinjali bëjnë me dije se rasti është raportuar më 19 qershor 2025, rreth orës 14:00, në Polici, ku është iniciuar rasti penal “Dhunë në familje”.

Sipas ankueses A.B., 38 vjeçare e cila është në lidhje dashurie me të dyshuarin I.K., 43 vjeçar, gjatë një përplasjeje verbale, ai ka eskaluar në dhunë fizike. Fillimisht e ka kapur për qafe dhe e ka shtyrë, më pas i ka marrë telefonin dhe e ka kapur fort për të dyja duart, duke ia shtrënguar me forcë.

I dyshuari është intervistuar nga hetuesit dhe, pas konsultimit me Prokurorin kujdestar nga Departamenti i Përgjithshëm, është iniciuar procedura penale për dhunë në familje.

Në lidhje me rastin janë njoftuar me shkrim Qendra për Punë Sociale dhe Njësia për Mbrojtjen e Viktimave, ndërsa hetimet do të vazhdojnë për të sqaruar plotësisht rrethanat dhe veprimet e të dyshuarit.