Çitaku: Kosova buzë kolapsit – për Kurtin pushteti më i rëndësishëm se shteti

Deputetja e Partisë Demokratike të Kosovës, Vlora Çitaku, ka përsëritur thirrjen e saj për Lëvizjen Vetëvendosje që të marrë përgjegjësinë për zhbllokimin e procesit të konstituimit të Kuvendit, duke e akuzuar këtë subjekt dhe liderin e tij për vendosjen e interesave personale mbi ato shtetërore.

Pas përfundimit të seancës konstituive të së shtunës, e cila dështoi për herë të 35-të, Çitaku u shpreh e shqetësuar për krizën institucionale në vend.

“Për LVV, për Albin Kurti, pushteti është më i rëndësishëm se shteti. Egoja është më e madhe se Kosova, ambicia më e madhe se demokracia. Kjo situatë duhet të marrë fund dhe presim nga VV që të reflektojë”, tha ajo.

Deputetja e PDK-së paralajmëroi për pasojat e rënda që po i shkaktohen vendit nga vonesat në ndërtimin e institucioneve të reja.

“Kosova është buzë kolapsit. Çdo ditë kemi lajme për dëmin e pariparueshëm që kjo situatë po i shkakton ekonomisë. Dje pamë lajme të frikshme për krizën buzë kolapsit në sektorin e energjisë”, theksoi Çitaku.