Publikohet video

Behnam Shahriyari, një zyrtar i lartë i Forcës Quds të Gardës Revolucionare Islamike (IRGC), ka humbur jetën në një sulm ajror izraelit gjatë natës në Iranin perëndimor, sipas informacioneve nga ushtria izraelite.

Shahriyari ishte drejtues i Njësisë 190 të Forcës Quds, e cila kishte përgjegjësinë për transferimin e armëve tek grupet e mbështetura nga Irani, përfshirë Hezbollahun në Liban, grupet palestineze në Gaza dhe rebelët Huthi në Jemen.

Ai u godit ndërsa ishte në lëvizje me makinë, rreth 1,000 kilometra larg territorit të Izraelit. Ushtria Izraelite (IDF) ka bërë të ditur se ka ndjekur aktivitetet e Shahriyarit për vite të tëra dhe e ka patur në shënjestër që nga viti 2009.

“Si pjesë e rolit të tij, Shahriyari ishte përgjegjës për të gjitha transferimet e armëve nga regjimi iranian te përfaqësuesit e tij në të gjithë Lindjen e Mesme dhe ka punuar për vite me radhë për të armatosur organizata të ndryshme terroriste, duke kontribuar në realizimin e planit të regjimit iranian për shkatërrimin e Shtetit të Izraelit,” thuhet në një deklaratë të IDF-së.

Sipas ushtrisë izraelite, Shahriyari ka bashkëpunuar drejtpërdrejt me Hezbollahun, Hamasin dhe regjimin Huthi, duke furnizuar ata me raketa të përdorura në sulmet kundër Izraelit gjatë konflikteve të fundit. Përveç armëve, ai dyshohet se mbikëqyrte transferimin e qindra milionë dollarëve çdo vit nëpërmjet një rrjeti kompanish fasadë, këmbimoreve dhe kurierëve në Turqi dhe Liban.

IDF ka vlerësuar eliminimin e Shahriyarit si “një goditje të rëndë ndaj aftësisë së organizatave terroriste për t’u riarmatosur, pas humbjeve të mëdha që kanë pësuar gjatë luftës”.