Balje pas deklaratës së Kurtit për “nomadët”: Nuk e mora si ofendim, ndoshta ishte i nervozuar
Deputetja e komunitetit boshnjak, Duda Balje, ka komentuar deklaratën e kryeministrit Albin Kurti, i cili ditëve të fundit ka përdorur termin “nomadë” për deputetët që po mungojnë në seancat për konstituimin e Kuvendit.
Në një prononcim për Ekonomia Online, Balje tha se nuk e ka parë këtë deklaratë si ofenduese për vete, ndonëse pranoi se shumë nga kolegët e saj në Kuvend e kanë perceptuar ndryshe.
“Nuk e di me çfarë qëllimi, kam parë që shumica e deputetëve kanë marrë këtë si një lloj ofendimi. Unë jam mësuar dhe për mua nuk është diçka,” deklaroi ajo.
Balje shtoi se mund të ketë qenë një moment revoltimi nga ana e Kurtit, duke marrë parasysh dështimin e vazhdueshëm të konstituimit të Kuvendit.
“Ndoshta ka qenë një moment kur ka qenë i revoltuar – edhe sot, 35 herë nuk është pak – por prapë se prapë besoj që kryeministri ka pasur një moment kur ka qenë më nervoz, edhe nuk po dua me besu se kështu ka menduar sinqertë,” shtoi deputetja.
