E mitura e raportuar e zhdukur gjendet në shtëpinë e një të rrituri – ai dyshohet për bashkëjetesë me të mitur

Gazeta Sinjali ka siguruar detaje  lidhur me një rast të ndjeshëm në komunën e Gjilanit, ku një vajzë e mitur, e raportuar si person i zhdukur nga prindërit më 20 qershor 2025, është gjetur në shtëpinë e një personi të rritur, me të cilin dyshohet se ka bashkëjetuar.

Burimet e Sinjalit bëjnë me dije se vajza L.A., 14 vjeçare është lokalizuar në fshatin Gumnishtë, në banesën e të dyshuarit Isa Sadiki, 23 vjeçar, ku sipas hetimeve të para, dyshohet për bashkësi jashtëmartesore me personin nën moshën gjashtëmbëdhjetë vjet.

Të dy janë shoqëruar në ambientet e Njësisë së Hetimeve për të Mitur, ku janë intervistuar në prani të avokatëve dhe zyrtarëve për mbrojtjen e të miturve.

Me vendim të Prokurorit të Shtetit, i dyshuari është ndaluar për 48 orë, ndërsa hetimet janë duke vazhduar.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.