Rrëfimi tronditës i 19-vjeçares

Një vajzë e re nga Peja ka përjetuar dhunë fizike dhe kërcënime të rënda nga i dashuri i saj, me të cilin kishte qenë në një lidhje përreth një vit dhe e gjithë kjo ndodhi në heshtje, deri ditën kur gjithçka shpërtheu.

Burimet Sinjali mësojnë se, viktima, E.L., rreth 19-vjeçare është paraqitur në Stacionin Policor në Pejë, ku ka raportuar për një përjetim të rëndë, një marrëdhënie dashurie që përfundoi në dhunë brutale dhe kërcënim me jetë.

Sipas saj, E.S., rreth 23-vjeçar, personi me të cilin ishte në lidhje, e kishte keqtrajtuar fizikisht dhe psiqikisht gjatë gjithë kohës, por ajo nuk kishte guxuar të raportonte.

Ditën kritike, teksa ndodheshin në një vilë, Selimaj e kishte goditur me shuplaka dhe grushte në fytyrë dhe pjesë të trupit, duke i shkaktuar lëndime të dukshme. Madje, sipas dëshmisë së saj, ai i kishte drejtuar një revole në kokë dhe i kishte thënë se “do ta vriste”, duke e shoqëruar me fyerje dhe sharje.

Pas intervistimit, viktima është kthyer në shtëpinë e prindërve të saj.

Policia ka ndërmarrë veprimet për ta arrestuar të dyshuarin, por ai nuk është hasur në banesën e tij dhe nuk i është përgjigjur as thirrjeve telefonike.

Me urdhër të Prokurorit të Shtetit, rasti është iniciuar si “Dhunë në Familje”, ndërsa veprimet hetimore po vazhdojnë.