E mitura e denoncon shokun për ngacmim – e refuzoi ta ndalë veturën, pastaj e ndoqi dhe i dërgoi mesazhe

Një vajzë e mitur nga Peja ka përjetuar një situatë shqetësuese nga një person që e njihte si shok. Ajo ka kërkuar ndihmën e Policisë pas veprimeve të dyshimta dhe kërcënuese që i janë bërë nga i njëjti, raporton Gazeta Sinjali.

Burimet e Sinjalit brenda hetuesisë bëjnë me dije se ngjarja ka ndodhur më 25 qershor 2025, në rrugën “Tahir Zemaj”, ku viktima, L.K, ka deklaruar se ishte duke udhëtuar me veturë me të dyshuarin S.V., rreth 35-vjeçar.

Sipas dëshmisë së saj, gjatë udhëtimit ajo kishte kërkuar që ai ta ndalonte veturën, por ai kishte refuzuar. Kur më në fund ndalon, ajo del nga vetura dhe shkon në një lokal aty pranë, por në atë moment fillojnë mesazhet shqetësuese nga i dyshuari.

Pasi kishte dalë nga lokali dhe po priste autobusin, ajo vëren se i dyshuari qarkullonte me veturë në afërsi, duke i shkaktuar edhe më shumë shqetësim.

Pas denoncimit, njësitet hetimore ndërmorën veprimet e nevojshme, ku në konsultim me Prokurorin e Shtetit, rasti është iniciuar si “Ngacmim”.