E denoncoi të birin për dhunë psikike – vetëm 5 ditë pasi doli nga burgu, përfundon sërish në pranga i riu

Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre, raporton Gazeta Sinjali.

Një rast i tillë është raportuar të mërkurën në mbrëmje në fshatin Vitomiricë të Pejës, ku një grua ka denoncuar djalin e saj për presion dhe sjellje kërcënuese.

Burimet e Sinjalit brenda hetuesisë bëjnë me dije se viktima, H.B, rreth 55-vjeçare, ka raportuar se djali i saj, R. M., rreth 35-vjeçar i cili është recidivist i rasteve të dhunës në familje, është liruar me kusht pas një dënimi prej një viti dhe vetëm pesë ditë pas lirimit ka rifilluar me presion dhe shqetësime të vazhdueshme psikike ndaj saj dhe anëtarëve të tjerë të familjes.

Sipas deklaratave, i dyshuari nuk është në gjendje të kontrollojë sjelljet e tij, konsumon terapi pa përshkrim mjekësor dhe ka shprehur kërcënime për vetëvrasje. Viktima dhe një dëshmitar kanë pohuar se ndihen të kërcënuar dhe të pasigurt nga veprimet e tij.

Pasi është ndaluar nga Policia, me ndihmën e autoambulancës, i dyshuari është dërguar për trajtim mjekësor dhe me vendim të mjekut kujdestar është hospitalizuar në repartin psikiatrik. Prokurori i Shtetit ka autorizuar ndalimin e tij për 48 orë, ndërsa rasti është iniciuar për “Dhunë në familje”.

Hetimet janë duke vazhduar.