Një rast i dhunës në familje është raportuar të dielën në mbrëmje në fshatin Gorozhdec të Pejës, ku një grua ka njoftuar Policinë se është sulmuar nga vëllai i saj.

Sinjali mëson se bëhet fjalë për Sh.M, 23 vjeçare, e cila ka pësuar lëndime në fytyrë, ndërkohë që vëllai i saj Sh.M, 24 vjeçar është arrestuar.

Burimet brenda organeve të rendit bëjnë me dije se viktima ka raportuar në polici se vëllai i saj e kishte goditur në buzë gjatë një konflikti verbal, duke i shkaktuar lëndime trupore. Ajo është dërguar për tretman mjekësor në Spitalin Rajonal të Pejës, e më pas është intervistuar në Njësinë e Dhunës në Familje.

Gjatë deklaratës me shkrim, ajo ka zbuluar se i dyshuari posedon edhe një armë zjarri në shtëpi, për të cilën nuk ka leje. Policia ka vepruar me bastisje dhe ka sekuestruar një pistoletë, për të cilën Sh. M. ka pranuar se e posedon, por ka deklaruar se “nuk e ka përdorur kurrë”.

Ndërkohë, në mbrojtje të tij, i dyshuari ka pretenduar se motra e tij ka probleme të shëndetit mendor dhe se lëndimi kishte ndodhur “aksidentalisht” gjatë një përplasjeje.

Pas intervistimit në prani të avokatit mbrojtës, Prokurori i Shtetit ka urdhëruar që ndaj tij të iniciohen dy vepra penale: “Lëndim i lehtë trupor” dhe “Mbajtje në pronësi, kontroll ose posedim të paautorizuar të armëve”.