Polici goditet nga vetura gjatë detyrës në Prishtinë

Një zyrtar policor ka pësuar lëndime trupore si pasojë e një aksidenti të ndodhur mesditën e sotme në rrugën “Nazim Gafurri” në Prishtinë.

Burimet e Gazetës Sinjali brenda Njësisë së Trafikut bëjnë të ditur se ngjarja ka ndodhur rreth orës 12:45, kur një veturë e tipit Volvo, me ngjyrë të bardhë, që drejtohej nga B. Gj., dyshohet se si pasojë e pakujdesisë ka goditur zyrtarin policor SH.Q., i cili ishte në detyrë.

Nga përplasja, polici ka rënë mbi një veturë tjetër të tipit Peugeot me ngjyrë të kuqe, e cila drejtohej nga T. M., duke shkaktuar dëme edhe në këtë veturë.

Zyrtari i lënduar është transportuar menjëherë në QKUK, ku sipas mjekëve, ka lëndime në pjesën e kokës afër veshit, por gjendja e tij është stabile dhe është jashtë rrezikut për jetë.

Hetimet rreth këtij rasti po vazhdojnë nga njësitet përkatëse.