E mitura raportohet e zhdukur, gjendet duke bashkëjetuar me një të rritur

Nuk janë të rralla rastet kur qytetarët kërkojnë ndihmën e Policisë për t’i gjetur familjarët e tyre që raportohen të zhdukur. Shumë shpesh angazhohen edhe njësi e grupe vullnetare që të zbulojnë gjurmët e personave që nuk dihet asgjë për fatin e tyre, raporton Gazeta Sinjali.

Kështu, një rast alarmues është zbuluar në Gjakovë, ku një 15-vjeçare e raportuar fillimisht si person i zhdukur është gjetur në shoqërinë e një të rrituri, me të cilin dyshohet se ka pasur një marrëdhënie jashtëmartesore të ndaluar me ligj.

Burimet e Sinjalit brenda Prokurorisë bëjnë me dije se rasti është raportuar më 29 qershor 2025, kur nëna e viktimës, B.T., rreth 15-vjeçare, ka paraqitur në stacion policor zhdukjen e vajzës së saj, e cila ishte larguar nga shtëpia dhe nuk ishte kthyer më.

Familjarët kishin tentuar ta kontaktojnë përmes telefonit, por ajo kishte qenë e paqasshme. Dyshimet e para kanë shkuar në drejtim të një të rrituri, që besohej se ndodhej me të miturën.

Pas aktivizimit të njësive policore dhe konsultës me Prokurorin e Departamentit për të Mitur, është identifikuar dhe lokalizuar i dyshuari – A.G., rreth 20-vjeçar, ndaj të cilit është hapur rast për veprën penale “Bashkësi jashtëmartesore me personin nën moshën 16 vjeç”, sipas nenit përkatës të Kodit Penal.

Viktima është gjetur dhe është nën përkujdesje, ndërkohë që rasti është duke u trajtuar me prioritet nga njësitë për të mitur dhe Prokuroria Themelore në Gjakovë.