Gruaja e sulmon burrin

Një ngjarje e rëndë brenda familjes ka ndodhur në orët e vona të së dielës në Prizren, ku një konflikt verbal mes bashkëshortëve ka degjeneruar në dhunë fizike të rrezikshme, me pasoja serioze për viktimën.

Burimet e Gazetës Sinjali bëjnë me dije se rreth orës 23:30, në rrugën “Vëllezërit Frashëri”, ka shpërthyer një përleshje në mes të B.G dhe bashkëshortes së tij, M.R..

Sipas deklarimit të viktimës dhe hetimeve fillestare, pas një debati verbal, e dyshuara ka marrë një thikë kuzhine dhe e ka goditur bashkëshortin në pjesën e abdomenit, duke i shkaktuar lëndime të rënda trupore.

Njësitë policore kanë dalë në vendin e ngjarjes dhe kanë arritur ta sigurojnë të dyshuarën si dhe mjetin e dyshuar, thikën, e cila është sekuestruar si provë materiale.

Pas marrjes në pyetje dhe dhënies së deklaratës në praninë e avokatit mbrojtës, është njoftuar Prokurori kujdestar, i cili ka lëshuar aktvendim mbi ndalim për 48 orë ndaj të dyshuarës.

Rasti po trajtohet si “Lëndim i rëndë trupor” dhe “Dhunë në familje”, ndërsa Sinjali do të sjellë detaje të tjera gjatë ditës.