Kapet drogë në burgun e Dubravës
Varësia nga droga nuk po i mban imun as personat që ndodhen prapa grilave, sidomos në Burgun e Dubravës – ku raportohen raste të tilla më së shumti dhe siç duket me lehtësi po futet droga brenda hapësirave të burgut, raporton Gazeta Sinjali.
Gazeta Sinjali mëson ekskluzivisht për një tjetër rast të tentativës për fshehje dhe qarkullim të lëndëve narkotike brenda Qendrës Korrektuese në Dubravë, që ka ndodhur më 10 korrik 2025, në orët e pasdites.
Sipas burimeve nga drejtësia, oficerët korrektues të burgut, gjatë një bastisjeje të zakonshme në Pavijonin Nr. 6, konkretisht në toaletin e përbashkët, kanë hasur në pjesën e ventilimit një sasi të fshehur marihuane.
Lënda narkotike ishte e mbështjellë në paketim të improvizuar, e ndarë në dy porcione, me peshë totale 94 gramë.
Pas konstatimit të rastit, në vend intervenoi Njësia për Hetimin e Narkotikëve nga Peja, e cila bëri pranimin dhe sekuestrimin e substancës.
Përkundër rregullave të kontrollit të rreptë dhe mbikëqyrjes së brendshme, ende nuk dihet se si dhe nga kush është futur droga brenda burgut. Lidhur me ngjarjen është njoftuar Prokurori kujdestar, i cili ka urdhëruar inicimin e rastit si “Posedim i paautorizuar i narkotikëve”, ndërsa hetimet po vazhdojnë nga DHTN-Pejë.
Sinjali do të qëndrojë pranë zhvillimeve të mëtejme dhe do të sjellë informacione të reja sapo të zbardhen detaje mbi personat përgjegjës dhe rrjetin e mundshëm që operon brenda ambienteve të burgut.
