Në zonën 40 km/h, voziti me shpejtësi 84km/h – dënohet shoferi me 200 euro gjobë

Policia në Ferizaj të premten ka gjobitur një shofer për tejkalim të shpejtësisë në rrugën “Brahim Ademi”.

Sipas njoftimit për media, shoferi me inicialet B.B. është kapur duke qarkulluar me 84 km/h, në një zonë ku kufizimi i lejuar është 40 km/h. Shpejtësia është matur përmes radarit laserik.

“Për këtë kundërvajtje, ndaj shoferit janë shqiptuar këto masa: Gjobë në vlerë prej 200 euro, 2 pikë negative dhe masë mbrojtëse – ndalim i drejtimit të mjetit motorik për 3 muaj”, thuhet në njoftim.

Policia Rajonale e Ferizajt ka theksuar se do të vazhdojë me kontrolle të rregullta dhe aktivitete të intensifikuara me qëllim të rritjes së sigurisë në rrugë dhe respektimit të ligjeve të trafikut.