Qeveria në detyrë e quan “të pabazuar në ligj” dhe “të motivuar politikisht” vendimin e Gjykatës Supreme

Qeveria në detyrë e Kosovës ka reaguar pas vendimit të Gjykatës Supreme për ta shpallur të kundërligjshëm Udhëzimin Administrativ të nënshkruar nga ministri në detyrë i Financave, Hekuran Murati, duke e cilësuar vendimin si të motivuar politikisht dhe të pabazuar në ligj.

Vendimi i Supremes lidhet me Udhëzimin për shfrytëzimin e pajisjeve elektronike fiskale, sistemeve fiskale dhe softuerëve elektronikë fiskalë, të miratuar nga Murati më 15 prill 2025 – vetëm një ditë pas seancës konstituive të Kuvendit, ku ai u betua si deputet.

Gjykata ka konstatuar se veprimi i ministrit përbën shkelje të Kushtetutës, pasi një person nuk mund të ushtrojë njëkohësisht detyrën e deputetit dhe ministrit. Por, Qeveria në detyrë ka kundërshtuar fuqishëm këtë interpretim, duke theksuar:

“Ky arsyetim është i pabazuar në ligj dhe përbën interpretim të njëanshëm e arbitrar të dispozitave ligjore. Neni 31 i Ligjit për Qeverinë nuk përmban asnjë ndalesë lidhur me nxjerrjen e akteve nënligjore nga një qeveri në detyrë apo ministrat në detyrë”.

Në reagimin e saj, Qeveria thekson se procedurat për hartimin e këtij akti kishin nisur më 20 nëntor 2024, kur ajo kishte ende mandat të plotë. Kjo, sipas saj, e bën udhëzimin legjitim nga pikëpamja procedurale dhe substanciale.

“Vendimi i Gjykatës Supreme është i brishtë edhe në aspektin logjik dhe kushtetues, për faktin se vetë ai e njeh ekzistencën dhe funksionimin e qeverisë në detyrë, por njëkohësisht e mohon të drejtën e saj për të ushtruar një kompetencë që nuk është e ndaluar me ligj. Kjo përbën një kontradiktë të qartë në arsyetimin e dhënë dhe cenon parimin e sigurisë juridike dhe funksionimit të vazhdueshëm të institucioneve të ekzekutivit”.