E pabesueshme! Udhëtari nga Gjermania kapet në Aeroport me orë luksi mbi 12,000€

Një rast i tentim-kontrabandës është parandaluar në Aeroportin Ndërkombëtar të Prishtinës nga zyrtarët doganorë, të cilët kanë zbuluar mallra të padeklaruara me vlerë të konsiderueshme.

Dogana e Kosovës njofton se në orët e paradites, një udhëtar i ardhur nga Gjermania është selektuar për kontroll në pikën kufitare Aeroporti – Arritje, pasi kishte kaluar përmes kanalit të gjelbër, që është i destinuar për udhëtarët pa mallra për të deklaruar.

Gjatë kontrollit të bagazheve, pas dyshimeve të ngritura nga imazhet në skaner, janë zbuluar dy orë dore me vlerë mbi 12 mijë e 600 euro, ndërsa vlera e taksave të papaguara kap shifrën prej 3 mijë e 700 euro.

Sipas njoftimit, ndaj udhëtarit është iniciuar procedurë kundërvajtëse për mosdeklarim të mallit, në bazë të nenit 244 të Kodit Doganor dhe të Akcizës së Kosovës. Mallrat janë ndaluar përkohësisht deri në përfundimin e procedurave të mëtejme.