Një 50-vjeçar shqiptar ka fituar të drejtën për të qëndruar në Mbretërinë e Bashkuar, pavarësisht se ka kryer një sulm të dhunshëm ndaj një burri, të cilit i shkaktoi fraktura të rënda në fytyrë duke e goditur me një çadër dhe më pas duke ia përplasur kokën në trotuar.

Ngjarja ndodhi në vitin 2016, kur Vangel Gkika, me shtetësi shqiptare dhe greke, udhëtoi me metro në Londër drejt një zone ku e dinte se ndodhej viktima, me të cilin kishte një konflikt të hershëm.

Ai e goditi me aq forcë me çadër sa ajo u shkatërrua plotësisht, më pas ia përplasi kokën dy herë në tokë. Viktima pësoi fraktura në faqe, mbeti me shenja në fytyrë dhe u detyrua t’i nënshtrohej një ndërhyrjeje kirurgjikale. Edhe pas një viti, ai vazhdonte të ndjente marrje mendsh dhe ankth.

Për këtë sulm, Gkika u dënua me 32 muaj burg dhe iu vendos një urdhër ndalimi 10-vjeçar që skadon në vitin 2027. Në vitin 2018, Ministria e Brendshme britanike urdhëroi dëbimin e tij për shkak të rrezikut që ai përbënte për rendin publik.

Megjithatë, pas disa apelimeve dhe një beteje ligjore që zgjati disa vite, Gjykata e Lartë e Imigracionit e përmbysi vendimin. Sipas gjykatëses Gaenor Bruce, sulmi ishte “jashtë karakterit të tij” dhe “një rast i vetëm”, ndërsa u theksua se Gkika nuk kishte kryer asnjë shkelje tjetër dhe kishte marrë vlerësime pozitive nga klientët e tij si piktor dhe dekorues në Surrey, ku jeton me familjen.

Gjykatësja u shpreh se nuk kishte prova që ai paraqet rrezik aktual për shoqërinë dhe se çdo veprim i ardhshëm do të kishte pasoja të rënda për të, përfshirë dëbimin dhe shkatërrimin e jetës që ka ndërtuar në Britani me familjen e tij.