Plaçkitet Michel Platini, një hajdut i vodhi mbi 20 trofe dhe medalje

Futbolli francez është tronditur sot nga lajmi për një grabitje në shtëpinë e legjendës Michel Platini, ish-lojtar i shquar, ish-trajner dhe ish-president i UEFA-s.

Ngjarja ka ndodhur në orët e para të mëngjesit, në një pronë të tij pranë Marsejës, ku persona të paidentifikuar hynë me forcë në rezidencë dhe vodhën trofe dhe medalje të paçmuara nga karriera e tij e lavdishme.

Sipas raportimeve të mediave franceze, gjithçka ndodhi rreth orës 05:30 të mëngjesit. Platini është zgjuar nga një zhurmë e dyshimtë në kopsht dhe, kur ka dalë për të parë se çfarë po ndodhte, ka parë një hajdut të maskuar me rroba të zeza duke u larguar me shpejtësi nga vendi i ngjarjes. Për fat të mirë, 70-vjeçari nuk është lënduar fizikisht, por tronditja psikologjike është e madhe.

Një humbje që vlen më shumë se paratë

Sipas burimeve të afërta me ngjarjen, grabitësit kanë thyer hyrjen e një hambari pranë shtëpisë së Platinisë, ku ruheshin trofetë dhe medaljet më të rëndësishme të karrierës së tij. Janë vjedhur rreth 20 çmime unike, duke përfshirë kupa, medalje dhe objekte të tjera me vlerë të jashtëzakonshme, jo vetëm materiale, por edhe historike.

Midis sendeve të vjedhura mund të jenë edhe çmime të lidhura me karrierën madhështore të Platinisë: tre herë fitues i Topit të Artë (1983, 1984, 1985), kampion evropian me Francën, fitues i Ligës së Kampionëve, Kupës së Fituesve të Kupave dhe Serie A me Juventusin, si dhe shumë çmime të tjera për lojtarin më të mirë dhe golashënuesin më të mirë.

Këto objekte përfaqësojnë një trashëgimi të pazëvendësueshme për Michel Platininë dhe familjen e tij. Dëmi total ende nuk është vlerësuar, por humbja është e jashtëzakonshme në aspektin sentimental dhe historik.

Policia nis hetimet

Policia e Marsejës ka konfirmuar nisjen e një hetimi për vjedhjen e rëndë. Aktualisht po merren dëshmitë nga të gjithë personat që mund të kenë informacion, ndërsa ekipi i analizës mjeko-ligjore po punon në vendin e ngjarjes për të gjetur prova të mundshme.

Michel Platini raportohet se është i qetë, por i tronditur nga incidenti. Edhe pse grabitësit kanë vepruar me shpejtësi dhe organizim të lartë dhe ende nuk janë arrestuar, shpresa mbetet që të paktën një pjesë e trofeve të vjedhura të rikthehet tek pronari i tyre legjitim.