Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre, raporton Gazeta Sinjali.

Kështu, një rast të dhunës në familje ka ndodhur pas mesnate në rrugën “Skënder Luarasi” në Prishtinë, ku një i ri ka dëmtuar pasurinë e babait të tij, pas konsumimit të tepruar të alkoolit gjatë një ahengu familjar.

Sipas burimeve të Sinjalit, ankuesi N.K., rreth 70-vjeçar ka raportuar se djali i tij, A.K, rreth 24-vjeçar, pas pjesëmarrjes në dasmën e djalit të vëllait, është kthyer në gjendje të dehur dhe ka shkaktuar shkatërrim të sendeve brenda shtëpisë.

Ankuesi ka deklaruar se nuk ka pasur sulm fizik, por dëmet materiale të shkaktuara nga i biri kapin shumën prej 700–800 euro, përfshirë dëmtimin e mobilieve dhe pajisjeve të tjera të shtëpisë.

Policia ka ndërhyrë në vendin e ngjarjes dhe i dyshuari është testuar për alkool, duke rezultuar me 0.70 promila në gjak, ndërsa për shkak të gjendjes së dehur nuk është intervistuar menjëherë.

Lidhur me rastin është njoftuar Prokurori kujdestar për “Dhunë në Familje”, i cili ka urdhëruar: Inicimin e veprës penale “Asgjësimi apo dëmtimi i pasurisë”.

Për këto arsye Prokurori ka nxjerrë e aktvendim për ndalim të të dyshuarit.

I dyshuari është dërguar në Qendrën e Mbajtjes dhe hetimi do vazhojë.