Ky është personi që u kap me armë në veturë – Tha se e mban për bjeshkë

Gazeta Sinjali mëson ekskluzivisht se një burrë është kapur mbrëmë me armë pa leje gjatë një kontrolli policor në Gjakovë.

Burime të sigurta të Sinjalit bëjnë me dije se më 24 korrik 2025, rreth orës 20:40, në rrugën “Gjergj Sokoli”, njësitë e NjRH-së kanë ndaluar një veturë Nissan Terrano, me të cilën po udhëtonte Fidan Mehmeti rreth 39-vjeçar.

Gjatë kontrollit, Policia ka gjetur një armë zjarri, 7 fishekë dhe 5 gëzhoja, të cilat janë sekuestruar në cilësinë e provave materiale.

I dyshuari ka deklaruar para hetuesve se nuk posedon leje për armën dhe se e mban me vete kur shkon në bjeshkë, për t’u mbrojtur nga kafshët e egra.

Lidhur me rastin është njoftuar Prokurori Kujdestar, i cili ka urdhëruar që rasti të inicohet për veprën penale “Mbajtje në pronësi, kontroll ose posedim të paautorizuar të armëve”, ndërsa i dyshuari është liruar në procedurë të rregullt.

Rasti mbetet nën hetim.

Shënim: Personat e apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.