Rrugë ilegale për të kaluar kufirin – Parandalohet kontrabanda me mallra

Policia e Kosovës, përkatësisht “Task Forca” e Drejtorisë Rajonale të Policisë Kufitare “Perëndimi”-Gjakovë, ka nisur hetime për një rast të kontrabandës së mallrave, pas një operacioni që u realizua në zonën e Gorozhubit në Prizren, në një terren malor afër kufirit mes Kosovës dhe Shqipërisë, raporton Gazeta Sinjali.

Sot, rreth orës 04:00, zyrtarët policorë kanë lokalizuar një kamion me targa të Republikës së Shqipërisë, i cili transportonte mallra komerciale dhe përdorte një rrugë ilegale për të kaluar kufirin, jashtë pikave të autorizuara kufitare.

Njësitet relevante policore janë angazhuar në rast dhe aktualisht janë duke punuar për identifikimin e të dyshuarve, të cilët janë në arrati.

Rasti është raportuar në Prokurorinë Themelore në Prizren dhe është hapur një hetim për veprën penale “Kontrabanda me mallra”.