Tentuan të fusin kontrabandë në Dubravë, ja çfarë zbuluan zyrtarët e burgut në qeset e zeza

Shërbimi Korrektues i Kosovës ka ndërmarrë një aksion të suksesshëm parandalues, duke penguar një tentativë për futje të kontrabandës në zonën sterile të Qendrës Korrektuese në Dubravë.

Sipas njoftimit zyrtar, pas pranimit të informacioneve proaktive dhe organizimit operativ në bashkëpunim me Njësinë e Inteligjencës së Shërbimit Korrektues të Kosovës, si dhe në koordinim me Departamentin për Siguri të Qendrës Korrektuese të Dubravës, është realizuar një bastisje e menjëhershme.

Gjatë kontrollit, zyrtarët kanë zbuluar pesë qese të zeza, të mbështjella dhe të izoluara me izolir të tejdukshëm. Brenda tyre janë gjetur:

• Lëndë e dyshuar narkotike, e ndarë në disa njësi, me peshë totale prej 98 gramësh (me mbështjellës)

• Pesë telefona celularë të markës Samsung, prej të cilëve njëri kishte të vendosur një SIM kartelë të operatorit IPKO

• Dy SIM kartela të papërdorura të të njëjtit operator

Ky operacion konsiderohet si rezultat i bashkëpunimit të ngushtë mes Njësisë së Inteligjencës, Departamentit të Sigurisë së QK Dubravë dhe zyrtarëve përgjegjës të sigurisë. Ai dëshmon përkushtimin e vazhdueshëm të Shërbimit Korrektues të Kosovës për të parandaluar çdo përpjekje për futje të kontrabandës dhe për të garantuar një mjedis të sigurt e të kontrolluar brenda institucioneve korrektuese.

Shërbimi Korrektues ka bërë të ditur se do të vazhdojë me masa të rrepta kontrolli për të parandaluar çdo tentativë për futjen e materialeve të ndaluara brenda burgjeve.