Ekskluzive: Të shtëna në restorant – Policia gjen 8 gëzhoja, identifikohet i dyshuari

Përderisa jemi në sezonin e dasmave dhe në kohën e pushimeve verore, të shtënat me armë zjarri nuk po ndalen as në gazmendet e ndryshme familjare, duke u rrezikuar në këto ngjarje edhe jeta e qytetarëve, raporton Gazeta Sinjali.

Një incident i tillë me armë zjarri ka alarmuar qytetarët në Hani të Elezit pasditen e 31 korrikut, ku brenda një restoranti ku ishte organizuar një dasmë janë dëgjuar të shtëna, duke rrezikuar sigurinë publike.

Burime të Sinjalit bëjnë me dije se ngjarja ka ndodhur rreth orës 15:30 në restorantin “Oslo”, ku pas përfundimit të ahengut, Policia ka marrë informatë për të shtëna me armë zjarri. Në vendin e ngjarjes ka dalë patrulla bashkë me hetuesit, të cilët kanë hasur pronarin e lokalit, i cili ka deklaruar se nuk ka dëgjuar krismat pasi ndodhej në kuzhinë.

Gjatë ekzaminimit të skenës janë gjetur 8 gëzhoja të kalibrit 7.62 mm, dëshmi e qartë e përdorimit të armës brenda lokalit.

Përmes veprimeve hetimore, policia ka identifikuar se dasmorët ishin nga fshati Dorbesh i Vitisë dhe në koordinim me Prokurorinë ka ndërmarrë veprime për t’i identifikuar përgjegjësit.

Rreth orës 19:30 është intervistuar Nazmi Rashiti, rreth 28-vjeçar, i dyshuar për përdorimin e armës. Gjatë kontrollit tek i njëjti është konfiskuar një revole e llojit “TT” dhe një karikator i zbrazët, që dyshohet se është arma e përdorur në dasmë.

Me vendim të prokurorit kujdestar, i dyshuari është liruar në procedurë të rregullt, ndërsa hetimet për rastin janë duke vazhduar.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.