“Tela elektrikë në Ujman”, flasin Policia dhe Prokuroria

Policia e Kosovës dhe Prokuroria Themelore në Mitrovicë kanë reaguar pas deklaratave të kryetarit të Shoqatës së Peshkatarëve të Kosovës, i cili kishte pohuar se në Liqenin e Ujmanit janë vërejtur tela elektrikë të zhytur në ujë, që sipas tij paraqesin rrezik për jetën e qytetarëve, raporton Gazeta Sinjali.

Në komunikatën e përbashkët thuhet se Policia e Kosovës, përmes Drejtorisë Rajonale në Mitrovicë Veri, ka nisur hetimet më 30 korrik 2025. I njëjti është intervistuar sot në cilësinë e dëshmitarit dhe ka deklaruar se gjatë një aksioni për largimin e varkave pa leje ka vërejtur tela në ujë dhe se, nëse aktivizohen, mund të paraqesin rrezik.

Policia ka pranuar edhe një video lidhur me rastin dhe ka kryer menjëherë kontrolle në terren përmes njësisë së kontrollit kufitar ujor. Nga verifikimi është konstatuar se telat nuk janë të lidhur me energji elektrike dhe nuk përbëjnë rrezik.

“Gjithashtu, Policia e Kosovës nuk ka pranuar as më parë ndonjë rast të raportuar në lidhje me këtë çështje. Pas analizimit të të gjitha provave dhe informacioneve, Prokuroria Themelore Mitrovicë ka vlerësuar se nuk ekzistojnë elemente të ndonjë vepre penale”, thuhet në njoftim.

Policia apelon qytetarët që të mos shqetësohen dhe të mos ndihen të frikësuar, duke garantuar se çdo rast i dyshimtë trajtohet me kujdes dhe seriozitet maksimal. Njësitë e Kontrollit Kufitar Ujor dhe njësitë e tjera policore vazhdojnë patrullimet e rregullta në Liqenin e Ujmanit për të garantuar sigurinë dhe për të monitoruar situatën në terren.