Ekskluzive | Tentimvrasje – i mituri godet bashkëmoshatarin me bisht të sëpatës

Përleshjet në të cilat përfshihen qytetarët në vendin tonë janë goxha të shpeshta dhe kjo po konsiderohet edhe si cenim i sigurisë publike. Të tilla incidente ndodhin qoftë nëpër rrugë, kafeteri apo edhe në hapësira të tjera publike, raporton Gazeta Sinjali.

Një ngjarje e tillë ka ndodhur mbrëmjen e 31 korrikut në qytetin e Vitisë, ku një mosmarrëveshje verbale mes dy të miturve ka përfunduar me tentimvrasje.

Burime të Sinjalit bëjnë me dije se rreth orës 21:40 në rrugën “Adem Jashari”, i dyshuari F.L., rreth 17-vjeçar, ka sulmuar me mjet të fortë, konkretisht me bisht të sëpatës, viktimën A.M., rreth 18-vjeçar, duke e goditur në zonën e kraharorit.

Pas sulmit, viktima është dërguar me urgjencë në Spitalin Rajonal të Gjilanit, ku mjekët kanë konstatuar se është jashtë rrezikut për jetë, por me lëndime trupore të konsiderueshme.

Hetimet për rastin i ka ndërmarrë Njësia e Hetimeve të Krimeve të Rënda (NJHP), e cila ka intervistuar viktimën në emergjencë dhe të dyshuarin në prani të prindit dhe avokatit. Me vendim të Prokurorit të Shtetit, F.L. është ndaluar për 24 orë në Qendrën e Mbajtjes, ndërsa procedura hetimore është duke vazhduar.

Motivi i sulmit dyshohet të jetë një konflikt verbal i çastit, por autoritetet po hetojnë nëse ka pasur tensione të mëhershme mes palëve.