Tentoi t’i jepte ryshfet policit në Sunny Hill

Një ngjarje e pazakontë është shënuar të enjten pasdite në hyrje të festivalit Sunny Hill në Bërnicë të Poshtme, ku një i ri është arrestuar nga Policia e Kosovës nën dyshimin për dhënie ryshfeti.

Sipas burimeve të Sinjalit, rasti ka ndodhur më 1 gusht 2025, rreth orës 16:20, kur Getoar Palushi, rreth 23-vjeçar, shtetas zviceran, gjatë hyrjes në parkingun e festivalit, ka nxjerrë nga xhepi 20 euro para të gatshme dhe ia ka dorëzuar një zyrtari policor, duke i kërkuar që ta orientojë se ku mund ta parkojë veturën.

Polici nuk e ka pranuar shumën, ia ka kthyer menjëherë paratë dhe ka raportuar rastin, çka ka çuar në arrestimin e menjëhershëm të të dyshuarit, i cili është shoqëruar në stacionin policor “Veriu”.

Palushi është intervistuar në prani të një avokati të caktuar sipas detyrës zyrtare, ndërsa për rastin është informuar Prokuroria e Departamentit për Krime të Rënda. Me urdhër të prokurores kujdestare, ndaj tij është iniciuar rasti “Dhënie ryshfeti” dhe është lëshuar aktvendim për ndalim prej 48 orësh.

Hetimet për këtë rast janë duke vazhduar.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.