Dy kosovarë dënohen me burg në Austri

Dy burra nga Kosova janë dënuar me burg në Gjykatën Rajonale të Ried, Austri, pasi u shpallën fajtorë për një seri vjedhjesh në apartamente dhe shtëpi. Gjykata dënoi me 3 vjet burg autorin kryesor të krimit, ndërsa bashkëpunëtorin e tij me 2.5 vjet.

Ngjarja e krimit dyshohet se ka ndodhur gjatë muajit prill, ku dy burrat nga Kosova, të moshës 58 dhe 57 vjeç, hynë në Austri nga Kosova përmes Hungarisë. Ata dyshohet se kanë kryer disa vjedhje në Ansfelden dhe Polling im Innkreis, duke shkaktuar dëme materiale dhe psikologjike tek banorët.

Sipas të dhënave të gjykatës, dy të akuzuarit dyshohet se kishin krijuar një “bazë” në Republikën Çeke, pranë kufirit austriak, së bashku me dy bashkëpunëtorë të tjerë. Më pas, autori kryesor 58-vjeçar dhe bashkëpunëtori i tij 57-vjeçar udhëtuan drejt Austrisë së Epërme për të kryer vjedhjet.

Gjatë procesit gjyqësor, 58-vjeçari, i cili u cilësua si autori kryesor, pranoi fajësinë për krimet e kryera.

Ndërkohë, 57-vjeçari, i cili dyshohet se drejtonte makinën e arratisjes dhe rregullonte akomodimin, mohoi çdo përfshirje në vjedhje. Megjithatë, juria e shpalli atë fajtor, duke e dënuar me 2.5 vjet burg. Ky i fundit kishte pasur edhe më parë një precedent penal për vjedhje në Zvicër.

Ndërsa vendimi ndaj 58-vjeçarit është tashmë i formës së prerë, 57-vjeçari ka bërë ankesë kundër dënimit të marrë.

Zyra e prokurorit publik nuk ka bërë ende një deklaratë mbi ankesën e tij. Hetimet për bashkëpunëtorët e tjerë të mundshëm janë duke vazhduar.