Ky është i dyshuari për vrasjen që ndodhi para pak çastesh

Një ngjarje e rëndë ka tronditur qytetin e Gjilanit këtë të dielë rreth orës 12:32, kur në një lokal në rrugën “Ibrahim Rugova” janë dëgjuar të shtëna me armë zjarri, duke lënë të vdekur dy persona dhe duke plagosur rëndë edhe dy të tjerë.

Sipas burimeve të IndeksOnline, viktimat janë babë e bir, ndërsa i dyshuari për këtë krim të rëndë është identifikuar si Mefail Shkodra, shtetas i Kosovës, i cili aktualisht ndodhet në arrati.

Të njëjtat burime bëjnë të ditur se konflikti dyshohet të ketë ardhur si pasojë e mosmarrëveshjeve për fajde, ndërsa policia tashmë ka nisur një operacion për kapjen e autorit të dyshuar.

Ngjarja është konfirmuar zyrtarisht edhe nga zëdhënësi i Policisë për rajonin e Gjilanit, Ismet Hashani.

Lexo edhe: Lajmi i fundit: Të vrarët në Gjilan janë babë e bir

“Ju njoftojmë se sot, më 10.08.2025, rreth orës 12:32, dyshohet se ka ndodhur një rast vrasje dhe plagosje me armë zjarri në rrugën ‘Ibrahim Rugova’ në Gjilan. Mjeku kujdestar ka konstatuar vdekjen e dy personave në vendin e ngjarjes, ndërsa dy të tjerë janë plagosur dhe janë dërguar për trajtim mjekësor në qendrën emergjente në Gjilan,” – tha Hashani.

Ai shtoi se i dyshuari për këtë rast është një person i njohur për policinë dhe se ndaj tij janë ndërmarrë të gjitha masat për lokalizim dhe arrestim.

“Njësitë relevante policore dhe prokurori i shtetit ndodhen në vendin e ngjarjes dhe po punojnë intensivisht për zbardhjen e plotë të rrethanave të këtij rasti të rëndë,” – tha tutje zëdhënësi.

Mefail Shkodra është një emër i njohur për organet e rendit, pasi edhe më parë është arrestuar për veprimtari të paligjshme, përfshirë fajde.

Hetimet për këtë ngjarje po vazhdojnë, ndërsa Policia e Kosovës ka bërë thirrje për bashkëpunim nga qytetarët për çdo informacion që mund të ndihmojë në kapjen e të dyshuarit.